10 رسائل نفسية هامة من رودي نبيل لدعم الطلاب قبل انطلاق امتحانات الثانوية

في رسالة خاصة لموقع «العالم في دقائق»، وجهت رودي نبيل، مؤسس جروب “معًا لغدٍ مشرق للتعليم” وأدمن جروب “حوار مجتمعي تربوي”، مجموعة من النصائح والرسائل المؤثرة من القلب لكل أب وأم، مع اقتراب امتحانات الثانوية العامة 2025، لمساندة أبنائهم نفسيًا واحتوائهم في واحدة من أهم مراحل حياتهم الدراسية، مؤكدة أن الدعم النفسي من الأسرة أهم كثيرًا من المذاكرة نفسها في هذا التوقيت الحرج.

خليك دايمًا حضنه الثابت وأمانه لما الدنيا تهتز حواليه

قالت رودي نبيل، إن الطالب في هذا الوقت لا يحتاج سوى أن يرى والديه مرسى الأمان في عينيه، وأن يشعر بأنهم الحضن الثابت الذي يتمسك به عندما تشتد الأمواج من حوله.

وعبرت: “ما تقولوش: شد حيلك وركّز وكفاية نوم من غير ما تسأله: عامل إيه؟ تعبان؟ محتاج تفضفض؟.. لأنه في اللحظة دي هو مش مجرد طالب، هو طفل كبير جواه خوف مستني حضنكم اللي بيشعر فيه بالأمان والدعم”.

حبك له مش مربوط بورقة مكتوب فيها درجات

وأوضحت أن حب الأهل يجب أن يكون مطلقًا وغير مشروط بالنتائج الدراسية، قائلة: “ابنك لازم يحس ويسمع إن حبك مش مرتبط بـ ٩٥٪ ولا ٥٠٪.. قوله: أنا بحبك زي ما أنت وفخور بيك مهما كانت النتيجة.. حتى لو ما نجحش، أنا شايفك بطل لأنك حاولت.”

المقارنات بتكسر.. والقبول بيبني

حذرت من خطورة المقارنات التي تهدم ثقة الأبناء بأنفسهم، وأكدت على ضرورة استبدالها بكلمات داعمة: “بلاش تقولوا: ابن خالتك جاب كام؟ أو فلان أذكى منك.. قولوا: شايف تعبك وربنا هيكرمك على قد نيتك.. لأن كلمة واحدة تشحن طاقته لأسبوع مذاكرة كامل”.

لا تكن سببًا في توتره.. فهو أساسًا يحمل فوق طاقته

أشارت رودي نبيل إلى أن الطالب في هذه المرحلة يعيش قلقًا داخليًا شديدًا حتى لو بدا هادئًا، وقالت: “لو لقى وشك مشدود وصوتك عالي ونبرتك حادة هيتعب أكتر.. خليك قدوة في الهدوء وقوله: إنت قدها وأنا بحبك وراضي بيك”.

استمع له بكل ودن قلبك مش بس ودنك العادية

وأضافت أن الاستماع باهتمام صادق دون مقاطعة أو أحكام يمنح الأبناء راحة نفسية هائلة، مؤكدة: “حتى لو قالك إنه تعبان أو نفسه يسيب كل حاجة، اسمعه واحتويه.. ده مش ضعف، ده إنسان بيطلب دعمك بدون ما يقولها صريحة”.

لا تجعل الامتحان هو الذي يعرف ابنك بنفسه

أشارت إلى أهمية أن يدرك الطالب أن قيمته لا تُقاس بالدرجات وحدها، قائلة: “هو ضحكته، ومواهبه، وطيبة قلبه، وحنانه على أخته.. رزق الإنسان مش كله في الأرقام، فيه رزق في الصبر والتوفيق والحلال.”

الدعاء الحقيقي يوصل للقلب حتى لو ما اتقالش بصوت عالي

أكدت على قوة الدعاء الصادق من القلب، قائلة: “خلي دعواتك سلاحه السري.. قوله: أنا بدعيلك ومتأكد إن ربنا هيكرمك.. حتى لو ما بانش عليه هتلاقي قلبه بيهدى وبيطمن.”

شاركه تفاصيل يومه بعيدًا عن ضغط المذاكرة

ونصحت بأن يكون الجو الأسري أكثر دفئًا، عبر مشاركة الأبناء في تفاصيل صغيرة: “اعزمه على شاي، اعمل له أكلة بيحبها، افتحله أغنية زمان.. الحاجات الصغيرة دي بتفرق جدًا وبتخليه يحس بدفء البيت بعيد عن التوتر.”

لا تجعله يشعر أنه عبء.. بل نعمة غالية عندك

شددت على أهمية تقدير وجود الأبناء وعدم اعتبار انشغالهم بالمذاكرة مصدر ضيق: “لما تزهق من كركبة الكتب، افتكر إنك هتوحشه لما يكبر ويسيب البيت.. قول لنفسك: أنا فخور بيه وبمجهوده حتى لو ما حققش النتيجة اللي بيتمناها.”

لازم توصله إنك راضي بيه على أي حال

واختتمت الأستاذة رودي نبيل نصائحها برسالة شديدة الأثر: “الجملة دي لو وصلت لقلبه هتهديه أكتر من ألف نصيحة: أنا راضي بيك وفرحان بيك ومهما حصل أنا دايمًا في صفك.”

وفي نهاية تصريحاتها لموقع العالم في دقائق، أكدت رودي نبيل: “ابنك أهم من كل شيء.. محتاج حضن صادق ونظرة فخر وكلمة فيها دفء.. الدعم النفسي منكم هو أغلى وأقوى حاجة ممكن توصله قبل أي سؤال في ورقة الامتحان.”