تصريحات خاصة| مؤسس “معًا لغدٍ مشرق”: التعليم الفني مش فشل بل مستقبل حقيقي

في تصريحات خاصة لموقع “العالم في دقائق”، أكد رودي نبيل، مؤسس جروب “معًا لغدٍ مشرق للتعليم” وأدمن جروب “حوار مجتمعي تربوي”، أن نظرة المجتمع السلبية تجاه طلبة التعليم الفني أو التجاري نابعة من ثلاثة أسباب رئيسية، على رأسها الجهل بطبيعة هذه المجالات وإمكانياتها، مؤكدة “الناس كتير مش مدركة إن التعليم الفني بيخرج كفاءات حقيقية بتشغل السوق، ودا دورنا ودور الإعلام والمتحدث الإعلامي للوزارة، هي قضية وعي مجتمعي بالمقام الأول.”

وأوضحت أن السبب الثاني يتمثل في الصورة النمطية المترسخة داخل المجتمع، بأن الثانوية العامة هي الطريق الوحيد للنجاح، قائلة “دي فكرة خاطئة تمامًا، وإن من فاته الثانوي العام صار مستقبله محدود جدًا”.

وأشارت إلى أن السبب الثالث هو غياب التوعية المجتمعية التي ترفع من قيمة التعليم الفني، وتسهم في إبراز نماذج ناجحة تخرجت من هذا النوع من التعليم، مضيفة “ودا حقًا يرجع للإعلام وإنتاج كوادر قادرة على المنافسة…”

وشددت رودي نبيل على أن هناك تغييرًا حقيقيًا بدأ يظهر على أرض الواقع، مشيرًا إلى أن الدولة بالفعل بدأت تولي اهتمامًا كبيرًان للتعليم الفني، حيث أصبح له نصيب أكبر في الكليات والمعاهد، إلى جانب فرص جديدة بدأت تفتح أبوابها أمام خريجيه، قائلة “بقى في دعم ملموس من الحكومة والشركات علشان تجهز الطلبة لسوق العمل، وده شيء بيدينا أمل حقيقي في المستقبل، وبنتمنى إن الاهتمام ده يزيد أكتر.”

وأضافت “علشان كل طالب يدخل المجال ده يلاقي قدامه فرصة حقيقية للمنافسة والنجاح، ويشوف إن اختياره ماكنش بديل، بل كان قرار صح”.

رسائل دعم لطلاب التعليم الفني: “أنت مش فاشل“

وفي حديثها، وجهت رودي نبيل رسائل دعم قوية لطلاب التعليم الفني، خاصة لمن لم يؤهلهم مجموعهم للالتحاق بالثانوي العام، مؤكدًا أن رفع معنويات هؤلاء الطلاب ضرورة حقيقية، وقالت: “أنت مش فاشل، ولا ضعيف، أنت لسه في بداية طريق طويل واللي جاي أحسن بإذن الله. المجموع مش مقياس ذكاءك ولا هيحدد قيمتك، في ناس كتير جابت مجاميع كبيرة ومش لاقية نفسها”.

وأوضح أن التعليم الفني يحتوي على تخصصات يمكن أن يتميز فيها الطالب ويجد فيها فرصًا حقيقية، مؤكدًا على أهمية التوازن بين ما يُدرّسه الطالب وبين متطلبات سوق العمل، مضيفة “ممكن تبدأ صغير، لكن بإصرارك تكبر وتعدي ناس كانت فاكرة نفسها أعلى. صدقني، الشغل العملي ساعات بيفتح أبواب أسرع من التعليم النظري”.

وتابعت “ما تخليش كلام الناس يحبطك، اللي بيحكموا من بعيد ما يعرفوش إمكانياتك، ومفيش إنسان مش متميز، المهم تعرف إنت متميز في إيه، وده بداية النجاح الحقيقي”.

نقطة قوتك هي مفتاحك

وأوصى رودي نبيل الطلاب بالتركيز على نقاط قوتهم والعمل عليها، مؤكدًا:
“لو بتحب الصيانة أو الكهرباء أو الإدارة، خليك فيها. الدنيا مش واقفة على باب معين، وفي مليون باب تاني تقدر تفتحه”.

وأضافت”كل ما تحس إنك ضعيف، افتكر إن اللي وراك حلم كبير لازم يتحقق. أوعى تنسى، ربنا شايف تعبك وهيوفقك لو نيتك صادقة وإرادتك حقيقية”

المستقبل مش في الثانوية العامة بس

واختتمت رودي نبيل تصريحاتها بالتأكيد على أن النجاح لا يُقاس بالالتحاق بالثانوية العامة، وإنما بالاجتهاد والإصرار، وقال:
“المستقبل مش في الثانوية العامة، ولا في أي مكان بعينه، المستقبل في إيد ربنا أولًا، وبعدين في عزيمتك وإصرارك”.

وتابعت “حدد هدفك وصمم عليه، مفيش حد يقدر يحدد مصيرك غيرك، ولا حد يقدر يكسرك إلا لو أنت سمحتله. كمل وأنت رافع راسك، وقول لنفسك كل يوم أنا أقدر”، “اللي اتأخر النهارده ممكن يسبق بكرة، الأيام دايمًا بتتغير، والفرص بتظهر للي جاهز. ممكن تتعلم صنعة تبقى فيها عبقري، وممكن تكمل تعليمك بعد الفني وتدخل كلية من الكليات العملية القوية. الطريق مش مغلق، بس محتاج مجتهد مش متخاذل”.

وختم رودي نبيل قائلة “افتكر دايمًا إنك مش أقل من أي حد، بالعكس يمكن تكون أقوى لو صدقت نفسك.”