قبل ساعات من امتحانات الثانوية العامة.. خطوات نفسية تضمن استقرار ابنك من رودي نبيل

في تصريح خاص لموقع العالم في دقائق، قدمت رودي نبيل، مؤسسة جروب “معًا لغدٍ مشرق للتعليم” وأدمن جروب “حوار مجتمعي تربوي”، مجموعة من النصائح النفسية الهامة التي يمكن أن تُحدث فارقًا كبيرًا في الحالة المزاجية للطلاب قبيل وأثناء وبعد ماراثون امتحانات الثانوية العامة 2025.

وأكدت أن الأهل والمعلمين والمجتمع بأكمله، لديهم دور جوهري في تقديم الدعم النفسي الحقيقي للطلاب، قائلة: “إزاي نحبب ولادنا في الامتحانات؟ إزاي نطمنهم؟ إزاي نعديهم الفترة دي بسلام نفسي؟ كل ده مش محتاج غير وعينا وتفهمنا”.

ما قبل الامتحانات.. ركزي على ثقة ابنك بنفسه

قالت “رودي”: “كل أم وكل أب محتاجين يركزوا على دعم أولادهم نفسيًا، وده يبدأ بإظهار قدراتهم، والاعتراف بيها، مش لازم يبقوا متفوقين في كل حاجة، لكن كل طالب عنده جانب مميز، مهمتنا نكتشفه ونغذيه.”

وشددت على أهمية تحفيز الثقة بالنفس، من خلال الكلمات الإيجابية والدعم اليومي، قائلة: “ادعميه في كل تفاصيل يومه، حتى لو نسي حاجة أو ما فهمش نقطة، قولي له عادي، المهم إنك بتحاول.. خليه يحس إنك شايفاه ومقدراه، وراضية عنه في كل الأحوال، مش بس لو جاب درجات حلوة”.

كما نصحت الأمهات والآباء بتوفير الدعم العاطفي، موضحة: “غضوا البصر عن الأخطاء البسيطة، واحتووا توترهم.. الولد أو البنت مش مطلوب منهم يكونوا مثاليين.. كفاية إنك تقولي له: أنا فخورة بيك إنك بتحاول وبتجتهد”.

خلال الامتحانات.. الهدوء أول طريق النجاح

أشارت “رودي” إلى ضرورة عدم الضغط على الطالب أثناء فترة الامتحانات، مؤكدة: “خلي البيت مكان هادئ، ما تغيريش له مكان المذاكرة، ولا تشتتيه بتنقلات أو أوامر.. روقي حواليه، رتبي أدواته، وخلي البيئة المحيطة تحفزه على التركيز مش العكس”.

وأضافت: “شجعيه يبذل جهده، مش مهم النتيجة دلوقتي، المهم المحاولة.. ومهم كمان نعلمهم طرق بسيطة للاسترخاء، زي التنفس العميق أو التأمل، علشان يقدروا يواجهوا القلق”.

بعد الامتحانات.. لا تلخصوا ابنكم في نتيجة

في رسالتها للآباء، قالت “رودي”: “يا جماعة بلاش نربط حبنا لأولادنا بالنتيجة.. الامتحان مش نهاية العالم، ولا شهادة على الذكاء أو الفشل.. دي مرحلة وهتعدي، ولسه قدامهم مشوار طويل من النجاح”.

وحثّت على تشجيع الأبناء على التعبير عن مشاعرهم، وعدم كبتها: “سيبوا ولادكم يعبروا، لو عايزين يعيطوا سيبوهم، متقولوش: الراجل مابيعيطش، أو البنت لازم تستحمل.. التعبير عن المشاعر قوة مش ضعف”.

واختتمت حديثها بنصيحة ذهبية: “متقارنوش ولادكم بحد، كل طالب له بصمته، وكل عقل له طريقته.. حبوا ولادكم صح، وافتحولهم مساحة يكونوا نفسهم”.

نصائح عامة من رودي نبيل لدعم طلاب الثانوية العامة:

اسمعوا لهم كويس: خليك حاضر بكل حواسك، واسمح له يحكي من غير مقاطعة أو تقييم.

ادعموه حتى لو أخطأ: الدعم مش بس وقت النجاح، لكن كمان وقت الفشل.

علموه يعبر عن نفسه: اسأله عن مشاعره، وخليه يوصفها.. علمه إن الحزن مش عيب، وإن القلق مش ضعف.

وفروا له وقت للراحة: بعد الامتحانات، ساعدوه يرجع لحياته الطبيعية، خروجة، فسحة، فيلم بيحبه.. أوقات التسلية مهمة زيه زي المذاكرة.

وعبرت رودي نبيل: “كل طالب مميز في حاجة، وعليك كمربي أو ولي أمر، إنك تكتشفها.. وتغذيها.. وتدعمها، مش تضغط عليه عشان يكون نسخة من حد تاني”.